நிறங்கள்

நிறம் 1.

ஆரஞ்சு நிறப்பந்தை நீலநிறமென்றே 
அழைக்கிறாள் சஹானா 
மஞ்சளின் நிறம் கறுப்பென்றாகிறது 
வெள்ளையின் நிறம் ரோஸ் என்கிறாள் 
மாறிப்போன வண்ணத்தின் பெயரில் 
எல்லாமும் நிறமிழக்கின்றன 
இதுவரை அழைப்பட்டவைகள் 
வேறான பின் 
வானத்தை என்னவென்பாள் 
காத்திருக்கிறேன். 

நிறம் 2.

நிறங்களிலானவளின் தோள்களைப்பற்றும்
கொடியாகிறேன்
படர்ந்திட்டவனின் விரல்களில்
அவளொரு இழையாகிறாள்
கலவையின் குழப்பத்தில் கிளைத்திட்ட
புதுவண்ணம்
தேகங்களின் இயைந்த உருமாற்றத்தில்
வானவில்லாய் ஒளிமாற்ற
ராட்சச வண்ணத்துப்பூச்சியாகிறாள்
தூரத்தில் மூங்கில் துளைத்ததன் ராகமிசைக்க
நிறமாறிடுகிறது
காடும்